Олон улсын сансрын станцын (ОУСС) гадна талд 9 сарын турш ямар ч хамгаалалтгүй байсан хөвд дэлхийд буцаж ирээд хэвийн ургаж эхэлсэн нь шинжлэх ухааны салбарт том нээлт боллоо.
Японы эрдэмтэн Томомичи Фүжитагаар (Tomomichi Fujita) ахлуулсан судалгааны баг уг хөвдийг задгай сансарт 283 хоногийн турш байрлуулж туршсан бөгөөд үр дүнгээ 2025 оны 11-р сард "iScience" сэтгүүлд нийтэлсэн байна.
Туршилтын хугацаанд ургамал агааргүй орчин (вакуум), үхлийн аюулт хэт ягаан туяа болон температурын огцом хэлбэлзэл зэрэг сансрын хамгийн хатуу ширүүн нөхцөлд шууд өртжээ. Хөвд ийм эрс тэс орчинд амьд үлдсэн нууц нь түүний гаднах хатуу бүрхүүл болон аюул тулгарсан үед бодисын солилцоогоо бүрэн зогсоож "ичээнд" ордог байгалийн онцлогтой нь холбоотой юм.
Энэхүү түүхэн нээлт нь хүн төрөлхтөн ирээдүйд Сар болон Ангараг гараг дээр бааз байгуулах төлөвлөгөөнд асар том түлхэц болж байна. Эдгээр тэсвэртэй хөвдийг ашиглан гаргуудын үржил шимгүй хөрсийг боловсруулж, хүчилтөрөгч, хоол хүнс гарган авах хүлэмжийн экосистем байгуулах бүрэн боломжтойг баталлаа.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!