Австрали улсад болж буй эмэгтэйчүүдийн Азийн цомын тэмцээний үеэр улсынхаа төрийн дууллыг дуулахаас татгалзаж, эсэргүүцэл илэрхийлсэн Ираны шигшээ багийн таван тамирчинд Австралийн засгийн газраас хүмүүнлэгийн виз олгох шийдвэр гаргалаа.
Тэмцээний нээлтийн тоглолтын үеэр багийн ахлагч Захра Ганбари тэргүүтэй тоглогчид төрийн дууллаа дуулалгүй чимээгүй зогссон нь эх оронд нь шуугиан тарьсан юм. Ираны төрийн мэдээллийн хэрэгслүүдээр тэднийг "урвагчид" хэмээн цоллож, хатуу шийтгэл хүлээлгэхийг уриалж эхэлжээ.
Үүссэн нөхцөл байдлын улмаас тамирчид Австрали улсаас орогнол хүссэнээр тус улсын дотоод хэргийн сайд Тони Берк 2026 оны 3-р сарын 10-нд таван тоглогчийн визийг шуурхай баталгаажуулж, тэднийг Холбооны цагдаагийн газрын хамгаалалтад авсныг мэдэгдлээ.
Одоогоор нийт долоон хүн орогнол хүсээд байгаа бөгөөд зарим тамирчид ар гэрийнхээ аюулгүй байдалд санаа зовж байгаа ч Австралийн тал шаардлагатай бүх тусламжийг үзүүлнэ гэдгээ илэрхийллээ.
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!