Дэлхийн бүх улсад нөлөөлөх тул эв нэгдэлтэй байх чухал гэв

Ормузын хоолой дэлхийн нефтийн гол судас бөгөөд Азийн эрчим хүчний амин сүнс, хамгийн эмзэг цэг гэж шинжээчид тодорхойлдог.

Дэлхийн газрын тосны 20% нь энэ хоолойгоор дамждаг гол хэрэглэгчид нь Хятад, Энэтхэг, Япон, Өмнөд Солонгос юм. Дайны нөлөөгөөр энэ хоолой хаагдсан тул азийн газрын тосны салбарт хүнд цохилт болж, зарим улс орнууд ямартай ч импорт хийх өөр гарц гаргалгааг хайж, олж эхэлсэн байна.

Тухайлбал, Энэтхэг болон Хятад ОХУ-аас газрын тос авахаар болж байгаа бол Япон болон Өмнөд Солонгос болохоор АНУ болон Норвегиос импорт хийх юм байна.

Ормузыг бүрэн орлох эх үүсвэр одоогоор дэлхийн хаана ч байхгүй тул дээрх орнууд өөр бусад эх үүсвэрээс бага, багаар нь худалдан авалт хийж, нөөцөө бүрдүүлж байгаа гэсэн үг.

Ингэж эрэлт өссөн тул үнэ огцом нэмэгдэх магадлал өндөр, цаашлаад азийн үйлдвэрүүд түүхий эдийн хомсдолд орж болзошгүй. Мөн шинжээчдийн үзэж буйгаар Хятад, Энэтхэг зэрэг том импортлогчид (Орос, Бразил, Норвеги)-рүү зэрэг хандаж эхэлбэл нэг нийлүүлэгч дээр олон улс өрсөлдөж хомсдол үүснэ. Бүс нутгийн үнийн зөрүү ихэснэ, даатгал, тээврийн үнэ өснө, нийлүүлэлт удааширна.

Зах зээлийн үнийн огцом савлагаа бий болно. Дэлхийн эдийн засаг савлаж, хямрал нь дэлхийн бүх улс оронд мэдэгдэхүйц нөлөөлнө. Тиймээс болзошгүй эрсдэлээс сэргийлж, эдийн засгийн зөв төлөвлөлт бодлого гаргаж, аливаа улс эх орны удирдагчид эв нэгдэлтэй, нэгдсэн үзэл бодолтой, зөв шийдвэр гаргах нь хамгийн чухал асуудал болоод байна шүү гэж шинжээчид олон улсад анхааруулжээ.